Wednesday, September 6, 2017

വാക്കുകൾ

വാക്കുകൾ
....................

ചിട്ടയായി അടുക്കി വച്ചാൽ
ആയുധത്തേക്കാൾ
മൂർച്ച കൂടും
അവർ സ്വാതന്ത്ര്യത്തെക്കുറിച്ച്
ഉറക്കെ പറയും
അഴിമതിക്കാരെ
അഴിയ്ക്കുള്ളിലാക്കും

വാക്കുകളുടെ അടുക്കൽ
വശമില്ലാത്തവർ
അടിമകളെപ്പോലെ
മുട്ടുകാലിലിഴയും
യജമാന ഭക്തിയാൽ
വേട്ടക്കാരന്റെ പാദുകങ്ങൾ
നക്കി വെടിപ്പാക്കും.

അക്ഷരങ്ങളുടെ
അരമറിയാത്തവർ
ആയുധത്താൽ
ആധിപത്യം നേടും.

ഭൂമിയിൽ ചോരപ്പാടുകൾ നിറച്ച്
ചില വാക്കുകൾ നമ്മെക്കടന്നു
മനസിലേക്ക് ചേക്കേറും

പക്ഷെ, ഒരുനാൾ
എല്ലാ വാക്കുകളും
ചിട്ടയായി അടുക്കപ്പെടും
അപ്പോൾ അവയൊക്കെ
ആയുധങ്ങൾക്കുമേൽ
അധീശത്വം നേടും

അന്ന്
എല്ലാ മനസുകളിലും
ഓണം പൂത്തു നിറയും
അതുവരേയ്ക്കും
ഞാനടുക്കുന്ന വാക്കുകൾ?

ഇപ്പോൾ ആയുധങ്ങൾ
അടുത്ത ഇരയെത്തേടുന്ന
തിടുക്കത്തിലാണ്
ഭ്രാന്തെടുത്തു പായുകയാണ്

ഒറ്റപ്പെട്ട ചില വാക്കുകൾ
വഴിയരുകിൽ
വീണുപോയിട്ടുണ്ട്
അവയൊക്കെ
ഇനിയാരാണ്
ചിട്ടയായി അടുക്കി വയ്ക്കുന്നത്?
==================== CNKumar.

Sunday, February 12, 2017

ബഞ്ചമിൻ ഫ്രാങ്ക്ലോ ഇനി മരിച്ചവരുടെ കൂട്ടത്തിൽ

ബഞ്ചമിൻ ഫ്രാങ്ക്ലോ ഇനി  മരിച്ചവരുടെ കൂട്ടത്തിൽ

ബഞ്ചമിൻ ഫ്രാങ്ക്ലോ,
കൊല്ലപ്പെടുകയോ അല്ലെങ്കിൽ
ആത്മഹത്യ ചെയ്യുകയോ
ആണെന്നാണ്
ഇതുവരെ എല്ലാവരും
കരുതിയിരുന്നത്

തലേന്നാൾ വൈകിട്ട്
ചന്തക്കവലയിൽ വരുന്നതും
എല്ലാവരുമായി
വേണ്ടുവോളം മിണ്ടുന്നതും
എല്ലാവരേയും പോലെ
ഞാനും കണ്ടിരുന്നു.

മക്കൾക്ക് കുഞ്ഞുടുപ്പോ
അവലോസുണ്ടയോ
കെട്ട്യോൾക്ക്
കണ്മഷിയോ വാങ്ങിയതായി
ആരും സാക്ഷ്യപ്പെടുത്തിയില്ല.

ആയതിനാൽ
അന്നു രാവിൽ അരങ്ങേറിയ
സംഭവത്തെക്കുറിച്ച്
ഊഹാപോഹങ്ങൾ മാത്രം
തിരുകിയ വർത്തമാനങ്ങൾ
തന്നെയാണ് കുളിക്കടവിലും
അയൽക്കൂട്ടത്തിലും
സായാഹ്ന ചർച്ച.

എന്നാൽ,
ഭാര്യയുടെ അലമുറയ്ക്കിടയിൽ
ഉയർന്ന ചില പേച്ചുകൾ
ആരുടേയും ചെവിയിൽപ്പെട്ടില്ല
എന്നതാണ് അന്ത്യവിശകലനം.

കഴിഞ്ഞ അഥവാ
നടന്നു കൊണ്ടിരിക്കുന്ന
നോട്ടു നിരോധനക്കാലത്തെ
നല്ല നാളുകൾക്കിടയിൽ
(ക്ഷമിക്കണം ദേവനാഗരിഭാഷ
തെല്ലും വശമില്ല, സത്യം മൂന്നുവട്ടം
രാജ്യദ്രോഹി എന്നു വിളിക്കരുത്)
സാമാന്യം രണ്ടു ചാന്ദ്രമാസക്കാലം
ആ നല്ലവനായ
പെയിന്റിംഗ് തൊഴിലാളിയ്ക്ക്
പണിയില്ലാതെ പട്ടിണിയും
പരിവട്ടവുമായി കഴിയേണ്ടിവന്നതിലും
തദ്വാരാ ഉണ്ടായ മന:ക്ലേശവും
ആരോടും കടം ചോദിച്ചാൽ
അവരും ഇതേ സ്ഥിതിയിൽ കഴിയുന്നവരായതുകൊണ്ടും
പണ്ടൊരാൾ ബാങ്ക് നിക്ഷേപമായ്
കൊടുക്കാമെന്നു പറഞ്ഞ
പതിനഞ്ചു ലക്ഷം ക
കിട്ടാത്തതിന്റെ നിരാശയും
നൽകിയ സമ്മർദ്ദത്തിൽ
ഹൃദയപേശികൾ പണിമതിയാക്കി
എന്നൊട്ടോപ്സി ഉവാചാ.

ആയതിനാൽ
പ്രസ്തുത കാലത്തെ മരിച്ചവരുടെ
കൂട്ടത്തിൽ പേരു ചേർക്കുകയും
സർവ്വവിധ കഷ്ടനഷ്ടങ്ങളും
അനുവദിയ്ക്കുന്ന മുറയ്ക്ക്
കുടുംബത്തിനു കിട്ടുമെന്ന്
വിളംബരം ചെയ്യപ്പെട്ടിരിയ്ക്കുന്നു.

ഈ അവസരത്തിൽ
ഇന്നേനാൾ മുതൽ
മേപ്പടി ബഞ്ചമിൻ ഫ്രാങ്ക്ലോ
മരിച്ചവരുടെ കൂട്ടത്തിൽ
ഗണിക്കപ്പെടും.
================== CNKumar.


Wednesday, January 11, 2017

ചെഗുവേര

ചെഗുവേര

ചെഗുവേര
വെറുമൊരു പേരല്ല
പോരിൻ ചരിത്രം പകുത്ത
ചെന്താരകം.

ചെഗുവേര
തടവറയ്ക്കുള്ളിൽ കരുങ്ങിയ
മർദ്ദിത കോടികൾ
നെഞ്ചേറ്റിടുന്ന പുലർകാലസ്വപ്നം.

ചെഗുവേര
സിറിഞ്ചും സ്റ്റെതസ്കോപ്പുമെടുത്തൊരാ
കൈകളിൽ തോക്കേന്തി
സാമൂഹ്യ രോഗശാന്തിയ്ക്കായ്
പൊരുതിയ ഭിഷഗ്വരൻ.

ചെഗുവേര
ഭരണകൂടങ്ങൾ കാണാൻ മടിയ്ക്കുന്ന
പേക്കിനാവിന്റെ നാനാർത്ഥമായ്
കാലാന്തരങ്ങൾക്കതീതനായ്
ബൊളീവിയൻ കാടകങ്ങളിൽ
ശതകോടി സ്വപ്നങ്ങൾ കാണും
അഗതികൾക്കാശാപുഷ്പമായ്
പൂത്തിറങ്ങുന്ന വിപ്ലവവസന്തം.

ചെഗുവേര
ചാഞ്ഞു വീശും പടിഞ്ഞാറൻ കാറ്റല്ല
വിഷ വർഷം വഹിയ്ക്കും
സാമ്രാജ്യത്വക്കരിമേഘങ്ങളും
ഫാസിസ്റ്റുവർഗ്ഗീയത തൻ
കോട്ടകൊത്തളങ്ങളും
തകർക്കാനശ്വമേധം
നടത്തും കൊടുങ്കാറ്റ്.

ചെഗുവേര
യുവത തൻ നെഞ്ചകങ്ങളിൽ
മനിത സ്നേഹത്തിൻ
വജ്രശോഭ ചൊരിയുന്ന
വർത്തമാനത്തിൻ ദിശാസൂചകം.
ചെഗുവേര
ചിത്രങ്ങൾ പോലുമുറക്കം കെടുത്തുന്ന
ഭരണാധികാര ധൂർത്തിന്നെതിരേ
പൊരുതും ചരിത്രം വിധിച്ച
കുറ്റവാളിയല്ലാത്തൊരാൾ.

ചെഗുവേര,
മർത്ത്യരൂപം പൂണ്ടസ്നേഹം.
----------------------CNKumar.


Wednesday, March 2, 2016

Friday, August 14, 2015

Sunday, August 2, 2015

Friday, March 6, 2015

വിവര്‍ത്തനം ചെയ്യാത്ത കാഴ്ചകള്‍

വിവര്‍ത്തനം ചെയ്യാത്ത കാഴ്ചകള്‍  


പുകച്ചുരുളുകള്‍ കലിതുള്ളി
ആകാശത്തിലേയ്ക്ക്
കുതിച്ചുയരുമ്പോള്‍,
ഒരുകയ്യിലെരിയുന്ന പന്തവും
മറുകയ്യില്‍ പരശുമായി
ക്രൂദ്ധരാ,യലറി വിളിച്ചു  
തലങ്ങുംവിലങ്ങും
പേപ്പട്ടിയെപ്പോലാര്‍ത്തു നടക്കുന്ന
മനുഷ്യരൂപങ്ങളെ കണ്ടത്
ഉണര്‍വ്വിലോ ഉറക്കത്തിലോയെന്നു
സാക്ഷ്യപ്പെടുത്താന്‍
മാലഖക്കുഞ്ഞുങ്ങള്‍
മേലില്‍ വരില്ലെന്നുറപ്പുള്ളതിനാലാണ്
പുത്തന്‍ മേലങ്കിയും മുഖത്തേപ്പും
മുട്ടന്‍ വിലയ്ക്കു വാങ്ങിയണിഞ്ഞത്.

വേനലവധിയില്‍ നാട്ടിലേയ്ക്കു
പുറപ്പെട്ട കുപ്പിവളയിട്ട കുഞ്ഞുകൈ
രക്ഷയാചിച്ചു തീയ്ക്കുള്ളില്‍നിന്നും
പുറത്തേയ്ക്കു നീളുന്നത്
എന്ത് രസമുള്ള കാഴ്ചയാണ്.
തീയ്ക്കും മൈലാഞ്ചിയ്ക്കുമൊരേനിറം
മോബൈല്‍ക്യാമറയില്‍ ഒരുസ്നാപ്പു
കുട്ടികള്‍ക്ക് തീവണ്ടിയെ കാട്ടാന്‍,
തീപടരുന്ന ബോഗിയിലെ നിലവിളി
ആനന്ദദായകം, റിംഗ്ടോണിനു കൊള്ളാം,
നിങ്ങള്‍ പറയും, മാടമ്പിത്തരങ്ങള്‍ 
ഉരുക്കുരുകുന്ന കനലിനേക്കാള്‍ തീഷ്ണമായ് 
കണ്ണുകളിലടയാളപ്പെടുന്നുണ്ടെന്നു.

ഇപ്പോള്‍,
ബിഥോവന്റെ സിംഫണി കേള്‍ക്കുന്നു
നീറോയുടെ പുനര്‍ജ്ജന്മം
വെളുത്തച്ചിരി, കോമ്പല്ലുകള്‍
രാകിയൊതുക്കി നിരപ്പെടുത്തി,
അല്ല, ചുണ്ടുകളിലെ താംബൂലച്ചുവപ്പു    
ചോരപുരണ്ടതായി തോന്നുന്നുണ്ടോ,
അതൊക്കെ വെടിപ്പാക്കിയല്ലോ!
നഖത്തിനടിയില്‍ മാംസപ്പറ്റില്ലെന്നു൦ 
തീര്ച്ചയാക്കിയിട്ടുണ്ട്.

നായ്ക്കളിപ്പോഴും കുരയ്ക്കും
സുഗന്ധതൈലങ്ങളുടെ സുഖശീതളിമ
കരിഞ്ഞ മാംസത്തിന്റെ മണം മറയ്ക്കും
പതിച്ചുകിട്ടിയ സിംഹാസനത്തിന്‍റെ
ഉറപ്പാണ് സ്വപ്നത്തിലെപ്പോഴും.

തെരുവിന്ദ്രജാലം നടത്തുമ്പോള്‍
കയ്യടിയാണ് പ്രധാനം.
ചുഴറ്റുന്ന ചാട്ടയ്ക്കൊത്തു
കുരങ്ങന്മാര്‍ കാരണം മറിയും,
ഡോലിയുടെ താളം മറയാകും
അപ്പോള്‍, നാണയങ്ങള്‍ ചിരിയ്ക്കും
നിഘണ്ടുവിലില്ലാത്ത അര്‍ത്ഥതലങ്ങളിലേയ്ക്ക്
കാഴ്ചകള്‍ വിവര്‍ത്തനം ചെയ്യും.  

കണ്ണുകള്‍ക്ക്‌ ഗ്രഹണബാധയേറ്റ
വര്‍ത്തമാനങ്ങളില്‍
ചിലവാക്കുകളുടെ വക്കില്‍
ചോര കനയ്ക്കുന്നുണ്ട്.

================================= CNKumar.






Monday, October 13, 2014

ഞങ്ങളിങ്ങനെയിന്നും


ഞങ്ങളിങ്ങനെയിന്നും
  
വെയിലാണ്, വേനല്‍ വിളയാട്ടമാണ്
കിനാവിന്‍റെചില്ലയില്‍ കുറുകുന്നതൊക്കെയും 
നൊമ്പരത്തിന്‍ പ്രാക്കളാണ്,
കരിഞ്ഞപൂവാടിതന്‍ ഗതകാല ചന്തംവിളമ്പിടും  
പരിഭവച്ചിന്തുകളാണ്   
ഒക്കെയുമോര്‍ത്തിരിയ്ക്കുകയാണ്

കാറ്റാണ്, വീശിയടിയ്ക്കും  
കടല്‍ത്തിരപ്പാടിലടിപെട്ടുഴറും
കടലാസുവഞ്ചികളാണ്.
കാടാണ്, വിണ്‍വീഥിയൊക്കെയും  
പെയ്തുതിമിര്‍ക്കാന്‍ നിരയായ്നിരക്കും
കരിമുകില്‍ക്കാടുകളാണ്.
പാടിയപാട്ടുകളെല്ലാമെനിയ്ക്കുള്ള
യോര്‍മ്മക്കുറിപ്പുകളാണ്,
നിന്നെഞാനറിയുകയാണ്.

കയ്യേറ്റമാണ്, കരിയിലച്ചപ്പില്‍
ഉരഗങ്ങളിണചേരുമിടവഴിയൊക്കെയും
ലഹരിപതയുന്ന കണ്ണുകളാണ്.
തെരയുകയാണ്, ഓര്‍മ്മയിലിപ്പോഴും 
കുന്നിക്കുരുമണി കൂട്ടുന്ന കയ്യുകള്‍
തൊടിയിലെത്തുമ്പികള്‍ കിന്നാരമോതിടും കണ്ണുകള്‍
കരിവളചില്ലു ഞെരിയുന്ന ചെത്തങ്ങള്‍,
ചിന്തയില്‍ ചാട്ടുളിയായി വന്നെത്തും
ഞരക്കങ്ങള്‍ കാഴ്ചകള്‍, തീവണ്ടിയൊച്ചകള്‍,
ഒക്കെയും ചോരച്ചവാര്‍ത്തകള്‍.

പുഴയാണ്, ഓരോമുറിയും
കണ്ണീരുറവ നിറയു൦ കിണറാണ്,
പകുതിയില്‍ നിര്‍ത്തിയ യാത്രകളാണ്.
ജയിലാണ്, ഏകാന്തവാസം
വിധിച്ചവര്‍ക്കെയുമുത്സവമാണ്
ഇരയും പ്രതിയുമൊരുപോലെയാണ്.
ഇരുള്‍വീണ വഴികളില്‍ പതിയിരിയ്ക്കുന്നുണ്ട്
പളപളാ മിന്നുന്ന വാളിന്‍വായ്ത്താരികള്‍,
അതിലൊന്നെനിയ്ക്കുള്ളതാണ്.

നിരയാണ്, എണ്ണുവാനാകാതെ
വിധവകള്‍,കുഞ്ഞുമുഖങ്ങളമ്മമാര്‍,
ഇനിയും ലാളിച്ചുകൊതിയടങ്ങാതെയൊടുങ്ങിയോര്‍
ദുരയാണ്, ഇസങ്ങള്‍ക്കുപിന്നില്‍
തിരയൊടുങ്ങാക്കടല്‍ക്കഴുകന്റെ കണ്ണാണ്,
ചതിക്കുഴികളേറെ നിറഞ്ഞൊരു നടവഴിയാണ്
ജീവന്റെനാണയ൦ പന്തയപ്പണമാണ്   
കരുക്കളന്യോന്യം വെട്ടിമരിയ്ക്കു൦ ചതുരംഗമാണ്‌  
ഒക്കെയും നേര്ച്ചക്കുരുതികളാണ്.

മുറിവാണ്, വാര്‍ത്തകള്‍ക്കപ്പുറം  
കണ്ണില്‍ പെരുകുന്ന ചോരതന്‍ നനവാണ്
ചിതവിട്ടുയരുന്ന പുകയാണ്,
മാംസം കരിയുന്ന ചൂരാണ്,
കണ്ണില്‍ കൊടുംപകയൂട്ടി വളര്‍ത്തുന്ന രാവാണ്.
മത്സരിച്ചങ്കം കുറിയ്ക്കു൦ യുവാക്കളില്‍
സ്വച്ഛത നിറയ്ക്കാത്താതെന്തു നീ
മച്ചിലുറക്കം നടിയ്ക്കും വരേണ്യതേ?
ചുട്ടുപഴുത്തൊരീ മണ്ണില്‍ ചവിട്ടി
പൊട്ടിത്തകര്‍ന്നൊരീ നെഞ്ചകംതൊട്ടു
ഒച്ചനിലയ്ക്കാത്ത വരിശകള്‍ ചാര്‍ത്താന്‍
കവിതക്കുരുന്നുകള്‍ കുഞ്ഞാറ്റകള്‍
വന്നെത്തിടുന്നൊരു ദേശമേതു?
കൂടോരുക്കുന്നൊരു ചില്ലയേത്?

വെയിലാണ്, വേനല്‍ വിളയാട്ടമാണ്
കരിയാതെയിപ്പോഴും നില്‍പ്പാണ്
പാതയിറമ്പിലായ് കാട്ടുതകരകള്‍,
കാഴ്ച്ചപ്പരിധിയിലെത്താതെ പോയവര്‍
കാനേഷുമാരിതന്‍ പുള്ളിതൊടാത്തവര്‍
കള്ളികള്‍ക്കപ്പുറം തോണ്ടിയെറിഞ്ഞവര്‍
തീപടരുന്ന പ്രതീക്ഷകള്‍, പ്രജ്ഞവിട്ടെത്തുന്ന
ചോദ്യങ്ങള്‍ക്കുത്തരം നേടുന്നനാളുണ്ട്,
നേരു കിളിര്‍ക്കുന്ന നേരമുണ്ട്,
നാവുകളൊരു നൂറു ശാഖനീട്ടും
ചൂഴ്ന്നെടുത്തൊരാകണ്ണുകള്‍ സൂര്യപ്രഭനേടും
കബന്ധങ്ങളൊക്കെയും  പടയണിചേരും              
ഒക്കെയും ഓര്‍മയിലുണ്ടെന്നതോര്‍ക്കണം. 
======================================CNKumar.

Thursday, July 31, 2014

ഒറ്റപ്പെടുന്ന വര്‍ത്തമാനങ്ങള്‍


ഒറ്റപ്പെടുന്ന വര്‍ത്തമാനങ്ങള്‍


തനിയ്ക്ക് സൌകര്യമുണ്ടെങ്കില്‍
എന്നെയൊന്നു പകര്‍ത്തി വയ്ക്കെടോ.
എത്രനാളായി പിന്നാലെ നടക്കുന്നു
തനിയ്ക്കിനിയും നേരമെത്തിയില്ലേ?
ഗാസയില്‍ നിന്നു പുറപ്പെട്ടു വന്നിട്ട്
നാളെത്രയായെന്നറിയാമോ?

എന്റെ ഈ മുഷിഞ്ഞ തുണിസഞ്ചിയില്‍
നിന്നും പുറപ്പെടുന്ന നിലവിളികളും
ചോരമണക്കുന്ന കാറ്റും
നീയിനിയും തിരിച്ചറിഞ്ഞില്ലേ?

തെരുവുകളില്‍ ചത്തുമലയ്ക്കുന്ന
ജീവനുകള്‍ മനുഷ്യപ്പുഴുക്കളാണെന്ന്
നീ കരുതിയോ എന്നതറിയില്ല
പക്ഷെ, അവരിപ്പോഴും
അങ്ങനെതന്നെയാണ് കരുതുന്നത്
അല്ലായെങ്കില്‍ ഈ നിലവിളികള്‍
ഉയരുന്നഗാസ ശവപ്പറമ്പായി
ഇങ്ങനെതന്നെ നാളേറെയായി
തുടരില്ലല്ലോ.

ഓ ഗാസാ, നിന്നെയോര്‍ത്തെന്‍
നെഞ്ചകം കത്തുന്നു
കുഞ്ഞു നിലവിളികള്‍
കാതില്‍ നിറയുന്നു
ആരുടേതാണീ പിടയ്ക്കും
കുഞ്ഞുവിരലുകള്‍,
ചോരചാലിട്ടൊഴുകുന്ന തലകള്‍,
പുറത്തേയ്ക്കു തെറിച്ച കണ്ണുകള്‍,
കോണ്ക്രീറ്റ് കൂനയ്ക്കടിയില്‍
ചതഞ്ഞരഞ്ഞ ശവം
കടിച്ചുവലിയ്ക്കുന്ന നായ്ക്കള്‍,

ഇനിയും നിര്‍ത്താറായില്ലേ
ശവക്കൊതിയന്മാരുടെ കേളികള്‍?
ഒറ്റപ്പെട്ടെത്തുന്ന വര്‍ത്തമാനങ്ങള്‍
ഓട്ടക്കാതുകളില്‍ പതിയ്ക്കാതിരിയ്ക്കാന്‍
വേണ്ടിയല്ലേ ഹെഡ്സെറ്റ് കാതുകളില്‍
തിരുകിക്കയറ്റി നീയെപ്പോഴും
എന്നെക്കടന്നു പോകുന്നത്.  

എന്നിട്ട് നീപറയുന്നു
നീറുന്ന കരളുണ്ടെന്നു
ഈറന്‍ പൊടിയുന്ന
കണ്ണുകളുണ്ടെന്നു.

നിന്റെ മനസ്സില്‍ 
എന്നെയടയാളപ്പെടുത്താന്‍
ഇനിയുമാരുടെയനുമതിയ്ക്കാണ്
കാത്തിരിയ്ക്കുന്നത്?
========================CNKumar.